Gina-validate pa ang isa ka salakyan nga gingamit sang mga suspetsado bilang getaway vehicle sa pagpatay kay Negros Oriental Governor Roel Degamo kag walo nga iban pa, matapos nahibaluan nga Bacolod City ang address sang tag-iya sini.
Gin-abandona sang mga suspetsado ang mga salakyan sa Barangay Cansumalig, Bayawan City kun sa diin na-aresto sa amo nga barangay ang tatlo ka suspetsado.
Suno kay Police Major Joery Puerto, pinuno sang Bacolod City Police Office – Intelligence Unit, padayon pa nga ginavalidate ang isa ka salakyan nga naka-address sa Bacolod City kag ginpatigayunan sang background check ang tag-iya.
Samtang, suno sa tag-iya, iya ginbakal ang salakyan agud parentahan kag nakibot na lamang ini sang nahibaluan nga ang salakyan ang isa sa gingamit sang mga suspetsado.
Ginpahugtan naman sang kapulisan ang checkpoint areas sa posibilidad nga magsulod sa siyudad ang ginapangita pa nga mga suspetsado.
Nagpanugyan man ang hepe sang BCPO Intelligence Unit sa mga elected officials nga maghalong kag indi magkampante bangod nga masami nga nagatira ang kontra kun makita nga matawhay na.
