Patay ang isa ka scout ranger matapos gintiro sang isa sa mga customers sa To-lips Restobar sa Lacson Extension, Purok Hollow Blocks, Brgy. Singcang-Airport, syudad sang Bacolod kaina sang kaagahon.
Ginkilala ang biktima kay Private First Class Edmark Iwayan, 26 anyos residente sang Barangay Balintawak, syudad sang Escalante.
Suno kay Raquel Resuma, manager sang To-lips Restobar, alas 4:00 ang takna kahapon sang hapon, nag-inum-inum na sa nasambit nga bar kanday Iwayan kag ang upod sini nga si Private First Class Joebert Villagracia, 29 anyos sang Brgy. Hinolingan, Moises Padilla.
Kaupod man nanday Iwayan ang tag-iya sang bar nga si Joebert Visem nga anay suldado.
Suno kay Resuma, ginsiraduhan man sang mga ini ang pwertahan kag bintana bangud sila-sila man ang nagainom.
Pasado ala-1:00 ang takna kaina sang kaagahon nagpadulong sa bar ang grupo ni Ulyssis Carampatana nga isa ka bank accountant kag nag-ayo nga mainom sang 1 bottle kag nagpasugot man si Visem nga tag-iya sang bar.
Makaligad ang pila ka minutos nag-ayo liwat sanday Carampatana nga mainum pa sang one bottle apang wala na nagpasugot si Visem.
Suno sa manager sang To-Lips, naggabot sang armas-luthang si Carampatana kun sa diin nagreact man ang biktima nga si Iwayan kag didto na nagbayluhanay sang luthang.
Naigo si Iwayan sa ulo kag iban nga bahin sang lawas nga nagresulta sa uya nga kamatayon.
Nakabalos si Iwayan antes ini ginbawian sang kabuhi apang sa abaga lang naigo si Carampatana.
Napilasan man sanday Visem, Villagracia kag isa ka upod ni Carampatana.
Si Carampatana ang nakahospital arrest sa karon.
