Patay ang isa ka seafarer matapos nga makabunggo sa kudal nga human sa DI pipe sa Circumferential Road, Barangay Mandalagan, ciudad sang Bacolod kaina sang kaagahon.
Ginkilala ang biktima kay Ken Sayson, 33 anyos kag residente sang Barangay Dos Hermanas, ciudad sang Talisay.
Sa interview sang Bombo Radyo Bacolod kay Police Staff Sergeant Richard Dema-ala, traffic investigator sang Bacolod Police Station 3, papauli na si Sayson sa Dos Hermanas, Talisay City matapos nga nagdul-ong sang iya mga abyan sa Fortune Town, Barangay Estefania, ciudad sang Bacolod.
Suno kay Dema-ala, ginpahayag sang witness nga nag-overtake ang biktima sa isa ka motorsiklo sa crossing Villamar kag madasig ang pagmaneho sini tubtob nga naglapaw sa dalan kag nakabunggo sa kudal sang propiedad sang Rockwell.
Bangud sa impact sang pagkabunggo, nahapay ang portion sang kudal kag nagderecho si Sayson sa kahilamunan pila ka metros nagikan sa highway.// Pag-abot sang mga medic, wala na sang kabuhi ang biktima.
Kadungan sini, nagpanugyan si Dema-ala sa mga motorista nga maghalong sa pagmaneho bangud sa mahinay man ukon madasig, makaabot gid sa padulungan.
