Ginkumpirmar sang Philippine Coast Guard nga may ara sang shipping line nga nagkanselar na sang byahe sang barko, Bacolod-Iloilo vice versa bangod sa malain nga tiyempo.
Sa interview sang Bombo Radyo Bacolod kay Commander Jansen Benjamin, commander sang Coast Guard Station Northern Negros Occidental, ang Montenegro lines ang nagdeklarar sang kanselasyon.
Nahibaluan nga wala sang Storm Warning Signal nga gindagdag sa pagsulod sang Tropical Storm Ferdie kagab-i, nga nakagwa naman sa Philippine Area of Responsibility kaina sang kaagahon.
Bangod sini wala sang deklarasyon sang kanselasyon sang mga sea kag air trips ang National Weather Bureau PAGASA, apang nakadepende naman sa shipping line kun sila ang magakanselar sang byahe.
Nagpahanumdom na lamang ang PCG partikular na sa mga mananagat nga nagadala sang magagmay nga sakayang pandagat, nga mag-aligmat kag magbantay sa mga weather updates.
