Isa naman ka tiyangge ang nabiktima sang mga kawatan sa Purok KBS, Brgy Sum-ag , Bacolod City kahapon sang kaagahon, Enero 7.
Sa interview sang Bombo Radyo Bacolod kay Police Captain Michael Tuburan, station commander sang Bacolod Police Station 9, nagpadulong sa Bacolod Police Station 9 ang tag-iya sang tiyangge nga si Ronnie Arcasitas, 35 anyos, negosyante kag residente sang nasambit nga lugar agud magreport sang natabo sa iya tiyangge.
Suno kay Tuburan, nanotisyaran sang tag-iya nga nabuksan ang roll up door kag ang bintana sang tiyangge kag gin-aligar nga nadula ang P50,000 nga cash kag P35,000 nga balor ang sigarilyo.
May nakuha man nga Cctv footage, kag nakita ang wala makilal-an nga persona nga nagsulod sa store alas 11:53 sang Sabado sang gab-i.
Sa karun padayon pa ang imbestigasyon sang mga kapulisan sa insidente agud matumod ang suspek nga nakita sa cctv kag ginahibalo man kun amo man ang suspek nga nagpangawat sa balay nga may grocery store sa Barangay Cabug, ciudad sang Bacolod.
