Patay ang isa ka tricycle driver matapos ginluthang sa Deca Homes South Subdivision, Barangay Cabug ciudad sang Bacolod pasado alas 4:00 ang takna kahapon sang hapon, Abril 25.
Ginkilala ang biktima nga si Teresito Gepelga kag residente sa nasambit nga lugar.
Suno kay Police Captain Michael Tuburan, station commander sang Bacolod City Police Station 9, sa inisyal nga imbestigasyon sang kapulisan, samtang nagatambay si Gepelga sa iya tricycle, hinali lang may nabatian sang isa ka lupok ang mga residente malapit sa crime scene, kag ila nakita nga nagahigda na ang biktima.
Nakaagom ang biktima sang pilas sa ulo kag gindala pa ini sa hospital apang gindeklarar nga dead on arrival.
Indi man mapat-od kun nagabiyahe sang tricycle ang biktima bangud wala man ini sang pamatuod nga miyembro ini sang asosasyon sang mga tricycle drivers kag operators.
Wala man sang nakakita kun sin-o ang nagpatay sa biktima samtang nagapadayon naman ang pagpangusisa sang mga kapulisan natuhoy sa background sang biktima agod maestablisyar ang motibo sa pagpatay.
Wala man ang mga kapulisan sang recoveries sa crime scene magluwas sa tricycle sang biktima.
Padayon pa ang imbestigasyon sang mga kapulisan natuhoy sa insidente kag amo man ang pagtsekyar sang posible nga makuha nga CCTV footage sa lugar bangud wala naga-fuction ang CCTV sa entrance ukon exit sang nasambit nga subdivision.
Nagalaom man ang mga kapulisan nga may makuha nga CCTV footage agud nga makabulig sa pagtumod sa nagpatay sa biktima.
