Napatay ang isa ka tuig nga bata nga babayi samtang nasamaran ang driver kag ang iban nga pasahero matapos aksidente nga makabunggo ang ambulansya nga nasakyan sa waiting shed sa Barangay Paraiso, Sagay City, Negros Occidental sang Disyembre 21.
Sa interview sang Bombo Radyo Bacolod kay Police Lt. Leonel Orense, Deputy Chief of Police Office sang Sagay City Police Station, ang ambulansya ang nagikan sa Barangay Paraiso apang sang pag-abot sa dulhugon nga bahin sang dalan sa nasambit nga barangay mahimo nga wala mabanta sang driver kag madasig ang pagpadalagan sang bangud emerhensya gani nagderecho ini kag nagbunggo sa waiting shed sa atubang sang Lopez Central.
Suno kay Orense, ang isa ka tuig nga bata ang idal-on kuntani sa ospital bangud gin-alegar sang iloy nga naconvulsion gani nagpangayo ini sang bulig sa barangay gani ginsakay ini sa ambulansya.
Kaupod nga sakay sa ambulansya amo ang iloy sang bata, tiya kag isa ka katapo sang Barangay Peacekeeping Action Team (BPAT).
Suno kay Orense bangud sa aksidente ginbawian sang kabuhi ang isa ka tuig nga bata samtang gindala naman sa Dr. Ramon Gustilo Hospital sa banwa sang Manapla ang iloy sang bata, tiya kag isa ka katapo sang Barangay Peacekeeping Action Team (BPAT) agud madapatan sang pagbulong matapos masamaran.
Ang mga napilasan ang ginkilala kanday alyas Anne, 23 anyos nga iloy sang bata; Alas Jusep, 28 anyos kag staff sang Barangay Paraiso kag alyas Ruy, 42 anyos kag katapo sang BPAT.
Ang driver sang ambulansya ang mahimo mangatubang sang kaso nga reckless imprudence resulting to homicide kun magpasaka sang kaso batok diri ang iloy sang napatay nga bata.
