Narumpag kag naanod ang isa ka tyangge nga nahamtang sa kilid sang taytay sa Barangay 14, Bacolod City kun sa diin nahulog sa sapa ang 20 anyos nga apo sang tag-iya.
Sa interview sang Bombo Radyo kay Rogelio Gepana, nagatrabaho bilang traffic enforcer, kapin alas 12:00 sang kaagahon samtang nagahampang ini sang cellphone iya nabatian nga may nagragamak kag nakibot na lang ini nga narumpag kag naanod ang ila tyangge.
Suno diri, nagakatulog sa sulod sang tyangge ang iya 20 anyos nga apo kag nakibot na lang ini sang narumpag kag nahulog ini sa sapa.
Tuman ang kahadlok ni Gepana sa natabo apang nakita sini ang iya apo nga nagalangoy sa mabaskog nga current sang tubig kag ila man ini naluwas.
Sa karun yara sa City health ang iya apo nga nag-agom sang pilas.
Suno kay Gepana, gin ab-ab ang duta nga gintukuran sang ila haligi kag ini nagdausdos kag amo nga narumpag ang tyangge.
Nalakip sa na-anod ang mga softdrinks, mga baligya nila, ref, cellphone kag halos tanan nga materyales sang ila tyangge.
Nag-ekspektar ini nga may pag-ulan apang wala ini naglaum nga magtuga sang pagbaha.
Wala naman ini sang plano nga magpa-evacuation center bangod nga wala sang may mabantay sang ila nabilin nga gamit sa kahangawa nga kawaton.
