Patay ang isa ka welder samtang pilason naman ang upod sini matapos makuryente samtang nagatakod sang insulator foam sa isa ka atop sa Arao Progreso Village dos, Barangay Vista Alegre, Bacolod City alas-5:00 kahapon sang hapon, Pebrero 18.
Ginkilala ang mga biktima nga sanday Jilmar Caromayan, 44-anyos kag Wendel Unay, 42-anyos nga lunsay residente sang nasambit nga lugar.
Sa interview sang Bombo Radyo kay Police Captain Jay-r Reyes, Officer in Charge sang Bacolod Police Station 7, may ginakay-o ang mga biktima sa babaw atop sang isa ka balay sang hinali nga ginpalid sang hangin ang insulator nga ila ginatakod kag nag-igo sa electircal power line.
Ini ang nagresulta sang ila pagkakuryente kag nag-agom sang pila ka electrical burns sa nagkalain-lain nga parte sang ila nga lawas.
Gintinguhaan pa nga marevive si Jelmar kag gindala sa Corazon Locsin Montelibano Memorial Regional Hospital apang ini ang ginbawian gid sang kabuhi.
Samtang si Wendel naman ang gindala sa Metro Bacolod Hospital para sa nagakaigo nga pagbulong kag sa karun yara na sa maayu nga kahimtangan.
