Liwat na naman nga may nasapwan nga bangkay sa banwa sang Moises Padilla nga biktima sang bagyo TINO.
Pasado alas- 2:00 subong nga hapon may nasapwan nga bangkay sang babayi sa Hda. Sto. Domingo, Brgy Crossing Magallon, banwa sang Moises Padilla.
Ang bangkay may malaba nga buhok, may kulintas kag duha ka singsing apang wala na sang panapton kag yara na sa advance state of decomposition.
Sa interview sang Bombo Radyo kay Jericho, operator sang back hoe, kaina sang nagakutkut ini sa nagtululumpok nga mga dahon sang tubo apang nag-untat siya bangod may napanimahoan ini nga mabaho.
Suno diri, sang nagbalik ini kutkut subong nga hapon, nakita sini ang bangkay sang babayi nga nagatakilid nga natabunan sang dahon sang tubo.
Sa karun wala pa sang identity ang nasapwan nga bangkay.
Madumduman nga kaina sang aga may isa man ka bangkay sang babayi ang nasapwan sa Hda Pillar, Brgy Crossing Magallon, kag ini nakilal-an na kag natukiban nga ini residente sang Canlaon City, Negros Oriental apang naanod kag nasapwan na sa probinsya sang Negros Occidental.
Samtang, gilayon naman nga nagpadulong sa area si Jocelyn Alilaing nga nagapangita sa namissing sini nga mga hinablos.
Suno diri, siya residente sang banwa sang Himamaylan apang nagpadulong ini sa banwa sang Moises Padillla matapos mahibaluan nga namissing ang iya amay kag tatlo ka hinablos.
Suno kay Alilaing, sang Nobyembre 4, alas- 10:00 sang aga nagtabok sa suba ang iya amay kag mga hinablos apang naanod ang mga ini sa mabaskog nga daludo sang tubig.
Nasapwan na ang iya amay nga wala sang kabuhi apang missing sa gihapon ang tatlo sini nga hinablos nga sanday Lea- 16 anyos, Cindy- 18 anyos kag Ilay- 24 anyos.
