Napatay ang isa pa sa apat ka mga pasahero sang tricycle matapos mabungguan sang truck sa national road sang Hacienda Tipolo, Barangay Camandag, La Castellana, Negros Occidental, kahapon, Disyembre 8.
Ini ang 13 anyos nga bata nga lalaki nga una na nga ginsaylo sa Corazon Locsin Montelibano Memorial Regional Hospital sa ciudad sang Bacolod para sa dugang nga pagbulong bangud sa patal nga pilas.
Ginkilala ini kay alyas Jhay-R.
Madumduman nga una na nga napatay ang isa ka 18 anyos nga babayi sa nasambit nga insidente.
Sa inisyal nga imbestigasyon ang Tractor Head nga may trailer nga ginamaneho ni Ramy Momandre ang nagabiyahe halin sa Igapnulong padulong sa San Carlos City samtang ang tricycle gikan sa Mansalanao ang padulong sa town proper sang La Castellana.
Samtang sa vicinity sang Hacienda Tipolo, Barangay Camandag partikular na sa likuan sang dalan may yara sang nagayungyong nga kawayan nga ginlikawan sang truck.
Bangud sini nabungguan niya ang nasugata nga tricycle nga may sakay nga apat ka persona nga nagapadulhog sa dalan.
Naglabog ang mga sakay sang tricycle kun sa diin ang isa ang nalapakan sang royda sang truck nga ginkilala kay Jay Ann Varona.
