Isa ang patay samtang tatlo ang pilason matapos ginlabo kag ginbuno sa Hacienda Panaogao 2, Barangay 4, cuidad sang Silay, Negros Occidental sang Miyerkules, Mayo 22.
Ang napatay ang ginkikila kay Ciceron Bautista, 55 anyos kag amay sang isa sa mga pilason nga ginkilala kay Ronald Bautista, 31 anyos samtang ang isa naman ka napilasan amo si Andrew Mondragon, 25 anyos kag mga residente sang nasambit nga lugar.
Ginkilala naman ang suspek kay Meljun Mediane, 39 anyos kag residente man sang Hacienda Panaogao 2, Barangay 4, Silay City.
Sa interview sang Bombo Radyo Bacolod kay Police Lt. Col. Mark Anthony Darroca, hepe sang Silay City Police Station, santo sa inisyal nga imbestigasyon, nagpadulong ang mag-amay nga bautista sa balay ni Meljun agud nga mahitso kuntani ang daan nga hiligut-anon.
Suno kay Darroca, nagluntad ang pagbinaisay sa tunga ni Ronald kag ni Meljun bangud ini ang yara na sa impluwensya sang makahulubog nga ilimnon.
Si Mediane ang nagkuha sang kutsilyo kag ginbuno si Ronald apang indi man patal ang pilas.
Nagtambag naman si Ciceron apang ini ang ginbuno naman ni Mediane.
Suno kay Darroca, agud nga depensahan ang kaugalingon kag ang amay sini, nagkuha si Ronald sang espading kag ginlabo si Mediane apang indi man patal ang pilas sa butkon.
Nagtambag naman si Mondragon kag ginsagang ang espading kun sa diin napilasan man ini.
Gindala man gilayon sa ospital ang mag-amay nga bautista, si Mediane kag si Mondragon sa ospital apang ang amay nga bautista ang wala gid natabangan.
Sa karun estoryahon pa sang mga kapulisan ang pamilya bautista kun magapasaka sang kaso batok kay Mediane.
