BACOLOD CITY-Isa ang patay kag apat ang pilason matapos masandwich sa fuel tanker kag elf truck ang tricycle kag motorsiklo sa Bangga Metal ukon Alijis-Circumferential Road, Bacolod City kaina sang udto.
Nagapundo ang nagasundanay nga elf truck, tricycle kag motorsiklo bangud pula ang traffic light apang hinali lang ini ginbungguan sang fuel tanker.
Bangud sa katodo sang impact, nagdahog pa ang elf sang pila ka metros samtang nagtungtong naman ang tricycle sa natumba nga motorsiklo.
Bangud nadunot ang tricycle, dead on the spot ang sanitary crew sang Omniworks Incorporated nga si Garry Tabafa sang Barangay Cabug, Bacolod City samtang pilason naman ang iban nga mga pasahero diri kalakip na ang nagasakay sa motorsiklo.
Ang mga pilason ginalakipan nanday Gregie Paternal nga nagasakay sa motorsiklo samtang ang sa tricycle naman ang ginalakipan ni Jay Uguil kag duha niya ka bata nga lunsay menor de edad.
Suno sa driver sang elf nga si Cris Tomayo, tuman kadasig ang dalagan sang tanker kag mahimo nga wala sini natalupangdan nga pula ang traffic light.
Nakibot na lamang si Tomayo nga naglagapok na sa likod sang iya truck.
Ginpamatud-an naman sang traffic enforcer nga si Rey Ambos nga tuman kadasig ang dalagan sang tanker kag nagasirbato pa ini.
Gilayon naman nga ginpriso sa Bacolod City Police Station 7 ang driver sang tanker nga si Francisco Batad Jr. sang banwa sang Murcia.
Suno kay Batad, wala nagkagat ang preno sang tanker rason nga nagluntad ang aksidente. Naghingyo naman ini sang pasaylo sa mga himata sang biktima.
