Isa ang patay samtang apat ang pilason matapos makabunggo sa kahoy ang isa ka pribado nga salakyan sa ciudad sang Sagay, Biyernes sang gab-i.
Sa interview sang Bombo Radyo kay Police Major Albert Sy, hepe sang Sagay City Police Station, papauli na kuntani nagikan sa Bacolod sanday Shane Baluran, 31 anyos, nagamaneho sang salakyan; Eva Patigas, 47 anyos, nagapungko sa front seat; Hannah Caban, 40 anyos; Angie Albay, 35 anyos; kag Desiree Tolosa, 41 anyos sang hinali lang nga nakabunggo ang ila salakyan sa isa ka kahoy sa national road sang Salvacion 1, Brgy. Lopez Jaena, ciudad sang Sagay.
Bangud sa impact, nagwa gid sa salakyan si Patigas kag nakaangkon sang patal nga pilas nga gintunaan sang iya nga kamatayon.
Pilason naman ang apat ka mga kaupdanan sini kag yara sa karun sa balaybululngan.
Suno kay Sy, updanay sa opisina ang lima ka biktima.
