Isa ang patay kag apat ang pilason matapos magbunggo ang depampasahero nga jeep sa nakaparada nga 10-wheeler truck sa Bangga Carmen, Brgy. Granada, ciudad sang Bacolod kagab-i.
Sa interview sang Bombo Radyo kay Police Corporal Rodel Velarde, imbestigador sang Bacolod Police Station 5, nagpanyapon lang kadali ang driver sang truck nga si Jose Maria Deocampo sang hinali lang nga magbunggo diri ang ulo sang jeep nga ginamaneho ni Joshua Araujo, 56 anyos, sakay ang stepfather sini nga si Lorry Fernandez, 56 anyos sa frontseat kag asawa nga si Hazel Gatchalian, 24 anyos, sa likod upod ang duha sini ka mga kabataan nga sanday John Araujo, tatlo ka tuig kag Abby Joy Araujo, lima ka tuig.
Suno kay Velarde, nagikan sa Barangay Alangilan sanday Araujo bangud may gintambungan nga gamay nga pagtililipon kag gin-ako man ni Araujo nga nakainom ini.
Bangud sa makusog nga impact sang pagbunggo sang salakyan sa truck, natam-an gid ang yara sa frontseat nga si Fernandez apang suno sa imbestigador, nagaginhawa pa ini sang sila ang mag-abot.
Apang pag-abot sang rescue, gindeklarar na ini nga patay bangud sa frontal abrasion kag lower rib fracture.
Nakaangkon naman sang mga minor injuries ang apat ka iban pa nga mga pasahero.
Suno sa iya, temporaryo nga igadetain ang driver sang truck para sa proper disposition subong man ang driver sang jeep kun makagwa na ini sa ospital.
Nagapanindugan naman ang driver sang truck nga si Jose Maria Deocampo nga may yara ini sang ginbutang nga pula nga warning device sang iya ginpark ang salakyan kag nagasiga man ang hazzard sang iya truck.
Suno diri, nagpauli lang siya kadali agud manyapon lang kuntani apang matapos ang 15 minutos, wala pa ini nakatimo sang may nagpadulong sa ila balay kag ginpabalo nga nabungguan ang iya nga truck.
Suno kay Deocampo, kagab-i lang ang labing una nga kahigayunan nga nagpark ini sa nasambit nga lugar bangud pagkatapos sini manyapon, iya ini kuntani ideretso sa parking lot sa Shopping Lopez Jaena agud didto tulugan agud ipa-emission pagka-aga.
