Isa patay samtang kritikal ang isa ka Barangay Kagawad sa nagluntad nga pagpangbuno sa Purok Langka, Barangay Odiong, Moises Padilla, Negros Occidental.
Ginkilala ang mga biktima nga sanday Alfredo Altea, 45 anyos, lalaki, kasado kag Arnel Fernandez, 46 anyos, lalaki, kasado, Barangay Kagawad kag lunsay mga residente sang Barangay Odiong, Moises Padilla, Negros Occidental.
Samtang ang mga suspek ang ginkilala nga sanday Antonio Delapaz, 36 anyos, lalaki, kasado kag residente sang La Castellana, Negros Occidental kag Leo Delapaz, 31 anyos, lalaki, kasado kag residente sang Barangay Odiong, Moises Padilla, Negros Occidental.
Sa interview sang Bombo Radyo Bacolod kay Police Lt. Arnulfo Robles, Deputy Chief of Police sang Moises Padilla Municipal Police Station, mga alas 3:00 ang takna sang kaagahon nagtawag si Punong Barangay Richard Pecauco sang Barangay Odiong sa Moises Padilla Municipal Police Station agud nga magreport nga may nagluntad nga stabbing incident sa nasambit nga Barangay.
Suno kay Robles, gilayon man nga nagresponde sa lugar sang insidente ang alert team sang police station.
Santo sa imbestigasyon ang napatay nga si Altea ang may indi pag-intsindihanay sa tunga sang duha ka mag-utod nga nakapatay diri.
Gina-alegar nga si Altea ang naglakat na apang nagbalik pa kag nakita ang mag-utod nga nagapungko sa dalan sang kaagahon na.
Una nga ginbuno ni Altea ang mag-utod apang wala sini napuruhan kag ang magulang ang nabun-an sa tuhod kag ang manghod ang nakaagom man sang pilas sa ulo.
Nabilin ang kutsilyo sa tuhod sang magulang nga suspek gani ginkuha niya ini kag ginbuno kay Altea.
Suno kay Robles, si Fernandez, ang Barangay Kagawad ang nagpatunga agud nga magtambag kuntani apang wala natalupangdan nga Kagawad ini gani nabun-an man.
Ang mga suspeks ang yara na sa paghinakop sang Moises Padilla Municipal Police Station samtang ang Barangay Kagawad ang kritikal kag padayon man nga ginadapatan sang pagbulong.
