Isa patay samtang duha ang kritikal matapos ginbuno sa kapiyestahan sa Hacienda Santo Rosario, Barangay Guimbala-on, ciudad sang Silay kahapon sang kaagahon.
Ginkilala ang napatay kay Jake Sombria, residente sang Hacienda Camantero 2, Barangay Guimbala-on, Silay City.
Sa interview sang Bombo Radyo Bacolod kay Jay Rose Sombria, manghod sang napatay, mahimo nga may natabo nga hangkatanay sa magtimbang nga grupo antes nagluntad ang pagpamuno.
Apang wala pa gid maestablisyar kun ano gid ang rasun nga nagdangat sa pagbinun-anay.
Suno kay Sombria, lain nga grupo ang nakaengkwentro sang grupo sang iya nga magulang.
Ginpahayag man nga ang patakas nga direksyon kuntani ang alagyan sang grupo sang napatay samtang ang nakaengkwentro sang mga ini ang paubos, apang ginsundan sila sang grupo sang napatay.
Wala pa mahibaluan kun ano ang rason nga ginsundan sang grupo ni Jake ang pihak nga grupo.
Ginapahayag nga madulom ang lugar nga ginluntaran sang pagpamuno kag malayo na sa baylehan.
Si Jake ang naka-angkon sang pilas sa dughan samtang ang duha ang kritikal kag padayon nga ginabulong sa ospital.
Suno kay Jay Rose, lima ang nakaengkwentro sang grupo sang magulang sini kag tanan ang nadakpan man sang mga kapulisan nga karun nakahunong na sa Silay City Police Station.
Ang napatay ang nakapasar na kuntani sa gin-applyan sini nga trabaho samtang nagaeskwela.
Ginahulat pa ang desisyon sang pamilya kun magpasaka sang kaso batok sa mga suspetsado.
