Isa ang patay samtang duha ang pilason matapos magresulta sa pagtiniruhay ang pag-inom-inom sang magparientehanay sa EB Magalona, Negros Occidental kahapon sang hapon.
Sa interview sang Bombo Radyo kay Police Capt. Joseth Catonina, hepe sang EB Magalona Municipal Police Station, ginpahayag sini nga pasado alas 4:00 sang hapon sang nag-inom sanday Alejandro Selendron, 63 anyos, isa ka manughilot; live-in partner sini nga si Angelyn Magallanes, 32 anyos; kag bayaw nga si Romeo Magallanes III alyas ‘Rigor” sa EMI Homes Subdivision, Brgy. Tanza, EB Magalona.
Suno kay Catonina, sang gintsekyar ni Selendron ang iya kwarta nga nagabalor P90,000, nakit-an sini nga P23,000 nalang ang nabilin gani iya ginsukmaan si Angelyn naglalisanay ang duha.
Bangud diri, nagkuha sang kutsilyo si Romeo kag naghana kuntani nga bun-on ang bayaw apang nagsulod ini sa kwarto kag nagkuha sang calibre 9mm armscor kag ginpaarakan sang luthang ang mag-utod.
Nakaangkon sang igo sa dughan si Angelyn samtang natiruhan naman sang makaduha ka beses sa paa si Romeo, isa sa abaga kag isa sa pulso.
Suno sa hepe, sang nagdalagan si Romeo pagwa sa balay, ginlagas pa ini ni Selendron kag gintiro rason kun ngaa nasalabat pati ang ila kaingod nga si Winifredo Diosto, 42 anyos.
Ginhingagaw dala sa ospital ang tatlo ka biktima apang gindeklarar nga dead on arrival si Romeo.
Yara naman sa kritikal nga kondisyon si Angelyn samtang padayon pa nga ginabulong sa pribado nga ospital si Diosto.
Suno kay Catonina, boluntaryo nga nagsungka si Selendron sa kapulisan kag sa karun yara sa kustodiya sa EB Magalona Municipal Police Station.
Desidido naman nga magpasaka sang kaso ang live-in partner ni Romeo nga si Mylene Beboso, residente sang Silay City.
Sa interview sang Bombo Radyo kay Beboso, nagahilibiun ini kag nagapangayo sang hustisya sa natabo sa iya live-in partner kag amay sang iya lima ka tuig nga bata.
Suno sa iya, magaselebrar pa kuntani ang pamilya Magallanes sang ika-tatlo nga siyam sang ila amay nga nagtaliwan sang tinalikdan nga Oktubre kag sang Martes, nagselebrar man si Romeo sang iya ika-28 nga kaadlawan.
Suno diri, dapat lang nga mapriso si Alejandro kag indi na ini dapat nga makagwa pa.
