Patay ang driver sang tricycle samtang pilason naman ang duha ka bystander matapos gin-arado sang awto ang isa ka tricycle sa Barangay Taloc, Bago City.
Ang mga biktima ang mag-asawa nga ginkilala nga sanday Alyas Che-Che kag Alyas Charles nga nagabantay lamang kuntani sang salakyan padulong sa Bacolod City.
Sa inisyal nga impormasyon, ang Honda City nga salakyan ang gikan sa sur padulong sa norte nga dereksyon.
Nag-overtake ang awto sa isa ka truck apang nabungguan sini ang tricycle kag gin-arado pahigad kun sa diin nadalasa ang mag-asawa.
Ang awto ang nahulog naman sa kalog, nga gintow na lamang agud mapatakas.
Sa interview sang Bombo Radyo Bacolod kay Ronilo Aspan, naabtan sini ang asawa sang iya hinablos nga nagahigdaon na sa dalan kag may mga injury sa tiil.
Ang iya hinablos ang nabungguan man apang makasarang pa magtindog.
Ang duha ka bystander kag ang driver sang tricycle ang lunsay gindala sa Bago City Hospital apang ang driver sang tricycle ang gindeklarar nga dead on arrival.
Ang driver sang awto, ang gindala na sa Bago City Police Station, samtang suno kay Ronilo, depende na sa mga biktima kun sila ang magapasaka sang kaso.
