Patay ang isa ka 33 anyos nga lalaki samtang duha naman ang pilason matapos nakabunggo ang ginamaneho nga motorsiklo sa isa pa ka motorsiklo sa Purok Kabugwason Barangay Cabug, Bacolod City sang Oktubre 8 sang gab-i.
Ginkilala ang napatay nga si Arniel Alingasa, 33-anyos, nga nagamaneho sang Bajaj 125 kag residente sang Hacienda Fe, Escalante City.
Samtang ginkilala naman ang driver sang barako nga motorsiklo amo si Gilbert Gonzales, 38-anyos, angkas si Rowena Bibliotica, 36-anyos, lunsay residente naman sang Purok Kabugwason Barangay Cabug, Bacolod City.
Sa interview sang Bombo Radyo Bacolod kay Police Major Ramil Sarona, head sang Bacolod City Police Office – Traffic Management Unit (BCPO-TMU), natabo ang insidente pasado alas 9:00 ang takna sang gab-i kun sa diin imbulbado ang duha ka motorsiklo nga ginalakipan sang Bajaj kag Barako.
Ginausoy ni Alingasa ang dalan padulong west nga direksyon samtang padulong naman sa pihak nga direksyon si Gonzales.
Gina-alegar nag-overtake si Alingasa sa ginasundan nga motorsiklo kag iya nasugata sanday Gonzales kun sa diin nagluntad ang aksidente.
Suno kay Sarona nakaagom sang patal nga pilas si Alingasa bangud sa impact sang pagkabunggo kun sa diin ginhingagaw dala sa ospital apang wala na matabanggan kag gindeklarar dead on arrival.
Samtangm, nakaagom naman sang minor injuries sanday Gonzales kag Bibliotica kag gindapatan man sang nagakaigo nga pagbulong.
Suno kay Sarona, lunsay wala nagasuksok sang helmet ang mga sakay sang duha ka motorsiklo.
Dugang pa ni Sarona, may inisyal na nga pag-aregluhanay sa tunga sang pamilya sang mga imbulbado sa aksidente.
Nagpanugyan ini sa tanan nga mga motorista nga masami magsuksok sang helmet kag siguruhon nga mayo ang kondisyon sa pagmaneho kag masami panumdumon ang safety sa dalanon.
