Patay ang isa ka lalaki kag duha ang nasamaran matapos nagbungguanay ang ginamaneho sini nga tricycle sa nasugata nga motorsiklo sang Domingo sang aga sa Purok Narra, Brgy Tabugon ciudad sang Kabankalan.
Ginkilala ang mga imbulbado sa insidente nga sanday Norgen Casintahan, 47-anyos, driver sang Kawasaki Barako Black kag residente sang Purok Narra, Brgy Tabugon Kabankalan City, ang angkas sini nga si Jelmar Guardario, 48-anyos, residente sang Brgy Mandu-ay, ciudad sang Bayawan, Negros Oriental.
Samtang ang nagamaneho naman sang Rusi 125 nga motorsiklo ang ginkilala kay Dranreb Baylon, 36-anyos, kag residente naman sang Purok Kalabasahan, Brgy. Tapi, ciudad sang Kabankalan.
Sa interview sang Bombo Radyo Bacolod kay Police Captain Sammy Gasataya, Deputy Chief of Police sang Kabankalan City Police Station, ang tricycle nga ginamaneho ni Casintahan ang gikan sa Brgy. Tabugon kag padulong sa Brgy. Tapi kag ginaalegar nga yara sa impluwensya sang makahulubog nga ilimnon.
Suno kay Gasataya, madasig ang pagdala sang motorsiklo kun sa diin naglikaw ini sa lubak-lubak nga dalan.
Magabalik na ini kuntani sa iya nga righ of way sang ginlikawan man sang nakasugata nga motorsiklo apang nalab-ot gid ini.
Ginhingagaw ang mg aini dala sa ospital apang gindeklarar nga dead on arrival si Casintahan samtang ginrefer naman sa ospital sa Dumaguete si Guardario.
Sa karun may yara na sang inisyal nga settlement ang magtimbang nga bahin sa natabo nga aksidente.
