Isa patay samtang isa pilason matapos ginlabo sa Sitio Baclayan, Barangay Mahalang, ciudad sang Himamaylan, Negros Occidental.
Ang mga biktima ginkilala kay alyas Roming 31 anyos, may live in partner, nga amo ang ginbawian sang kabuhi kag magulang sini nga si Alyas Jojo, 35 anyos, may live-in partner, laborer, lunsay residente sang nasambit nga lugar.
Samtang ang mga supetsado amo sanday alyas Nicky, 23 anyos, single, laborer kag alyas Noynoy ara sa legal nga pangidaron nga mga residente man sa nasambit nga lugar.
Sa interview sang Bombo Radyo kay Police Major Anthony Grande, hepe sang Himamaylan City Police Station samtang ara sa namatyan ang mga suspect kag biktima nga lunsay yara sa impluwensya sang makahulubog nga ilimnon may nagluntad nga indi paghangpanay kanday Roming kag Noynoy.
Si Roming ang nagpauli sa ila balay kag nagkuha sang binangon kag nagmaoy apang ang binangon ang na-agaw ni Noynoy.
Kasunod sini, ginbalusan naman ni Nicky sang labo si Roming nga nakaangkon sang pilas sa ulo kag liog samtang si Jojo nga magatambag kuntani ang ginlabo naman ni Noynoy sa guya.
Gindala pa sa malapit nga hospital si Roming apang gindeklara nga dead on arrival, samtang si Jojo ang padayon pa nga ginabulong.
Nagapatigayon pa sa gihapon ang kapulisan sang hot pursuit operation sa mga nakapalagyo nga mga suspetsado.
