Isa ang patay kag isa ang pilason matapos gintiro sang duha ka mga wala makilal-an nga mga suspetsado sa ciudad sang Sitio Miyurungan, Barangay Buenavista, Himamaylan City, Negros Occidental.
Ginkilala ang napatay nga biktima kay Rogelio Areola, 32 anyos, residente sang Sitio Suba-Suay, Barangay Mahalang, Himamaylan City samtang ang pilason kay alyas Jun-jun, menor de edad kag residente sang Sitio Guyuron, Barangay Buenavista sa nasambit nga ciudad.
Sa interview sang Bombo Radyo Bacolod kay Police Lt. Col. Anthony Grande, hepe sang Himamaylan City Police Station, mga alas 10:00 ang takna sang gab-i na nareport sa mga kapulisan ang natabo nga shooting incident sa nasambit nga lugar.
Suno kay Grande sa ila pag-imbestigar, ginpahayag ni alyas Junjun nga nagasakay sila ni Areola sa bulldozer sang sila ang ginpaarakan sang luthang sang kapin duha ka mga suspetsado.
Suno kay Grande, narecover sa lugar sang insidente ang empty shell sang AK 47 nga high powered firearms.
Napuruhan si Rogelio apang ang menor de edad ang nakalumpat sa bulldozer kag nakadalagan apang nakaagom ini sang pilas sa abaga.
Ginalantaw naman nga daan personal grudge ang motibo sang pagpatay sa biktima.
May yara na sang persons of interests ang Himamaylan City Police Station sa nagtiro sa mga biktima.
Nagapadayon pa sa karun ang imbestigasyon sang Himamaylan City Police Station agud matumod ang motibo sa krimen kasubong man ang suspetsado.
