Patay ang 18-anyos nga lalaki samtang pilason naman ang kaupod sini matapos mabungguan sa Barangay Maricalum, Sipalay City, Sabado sang gab-i, Oktubre 25.
Ginkilala ang mga biktima kay JBoy Lahao Lahao, 18 anyos kag residente sang Sitio Dalipe Barangay Maricalum kag ang upod sini ang ginkilala Jason Sarita, 22 anyos kag residente sang Barangay Tabugon, Kabankalan City.
Sa interview sang Bombo Radyo Bacolod kay Police Lt Cipriano Lumanog III, Deputy Chief of Police for Operations sang Sipalay City Police Station, papauli na sanday Sarita kag Lahao lahao matapos nga makuha ang ginsukot sa ginbaligyaan sang uling sang masugata ang tricycle nga ginamaneho ni Edwin Bulanon.
Suno kay Lumanog, ang tricycle ang nagaekis ekis na sa dalan kag naga piraw piraw pa ang suga sini.
Ginlikawan sang duha apang sila ang nalab-ot kag nabungguan sagihapon.
Wala nagpundo si Bulanon apisar nga may nabungguan apang ini ang nadakpan sa hot pursuit operation sang mga kapulisan sa Sipalay City Police Station.
Santo sa imbestigasyon ang driver sang tricycle ang nag-ako nga ini ang halin sa birthday kag nakainum sang makahulubog nga ilimnon.
Suno kay Lumanog desidido nga magpasaka sang kaso ang pamilya sang biktima batok sa driver sang tricycle.
