(UPDATE) Patay ang babayi nga driver sang isa ka awto matapos aksidente nga makabunggo sa truck sa National Highway sang Purok Bouguinvilla, Barangay Caduha-an, Cadiz City alas-10:00 kaina sang aga.
Sa interview sang Bombo Radyo Bacolod kay Police Lt. Lovella Cordova, deputy chief of police sang Cadiz City Police Station, ang Hyundai Sedan ang ginamaneho ni Jenelyn Amante, 37 anyos, residente sang Cadiz Heights Subdivision, Barangay Tinampa-an, Cadiz City samtang sakay naman sini ang lima ka menor de edad kag isa ka senior citizen nga si Nelson Amante, 63 anyos.
Samtang ang driver naman sang Fuso Truck amo si Freddie Mariquit Jr., 39 anyos, residente sang Relocation, Barangay 21, Victorias City.
Suno kay Cordova, ang awto ang gikan sa Cadiz padulong sa Bacolod City samtang ang truck ang gikan sa Victorias padulong sa Cadiz City.
Sa imbestigasyon, ang awto ang may gin-overtake nga salakyan kag nagsulod sa pihak nga lane.
Aminado naman ang driver sang truck nga nakita sini nga nagasugata sa iya ang awto gani ginlikaw sini ang manobela.
Apang bangod madasig man ang dalagan sang awto, nalab-ot sini ang likod nga porsyon sang truck.
Ang impact ang nagresulta as pagkawasak sang nawala nga bahin sang ulo sang awto, kun sa diin dead on the spot ang driver.
Pilason naman ang lima ka kabataan kag senior citizen nga ginhingagaw sa Cadiz District Hospital kag Gustilo Hospital sa banwa sang Manapla.
Ang driver sang truck ang sa karun nakahunong sa Cadiz City Police Station.
