Isa patay sa nagluntad nga pagbunggoanay sang tricycle kag private car sa Hda Josefina, Osmenya Avenue, Brgy 21, siyudad sang Victorias.
Ang drayber sang Subaru Outback amo ang foreign national nga si Chen Hai Rui, 38 anyos residente sang Brgy 14, Bacolod City kag kaupod sini amo si Lyu Fangbin, 32 anyos, residente sang Brgy Mactan, Lapu-lapu City, samtang ang drayber naman sang tricycle amo si Raffy Magallanes, 37 anyos kag ang mga sakay amo sanday, Victoria Ladismol, 53 anyos, Lelanie Siason, 56 anyos, tatlo ka menor de edad kag ang biktima nga gindeklarar dead on arrival amo si Marjorie Magallanes, 36 anyos.
Sa interview sang Bombo Radyo kay Police Captain Genus David, Deputy Chief of Police sang Victorias City Police Station, sa inisyal nga imbestigasyon, naglapaw sa pihak nga lane ang salakyan gani nabugguan sini ang sugata nga tricycle nga naggikan pa sa simbahan.
Bangod sa collision, patay ang isa ka sakay sang tricycle samtang anom naman ang pilason.
Nahibaluan man nga yara sa impluwensya sang makahulubog nga ilimnon ang suspetsado.
Sa karun ang suspek yara na sa kustodiya sang Victorias City Police Station.
