Isa ka pasahero ang patay samtang 41 naman ang pilason lakip na ang driver kag konduktor matapos matumba ang ceres bus sa syudad sang Bago kaina sang udto.
Sa interview sang Bombo Radyo Bacolod sa deputy chief sang Bago City Police Station nga si Police Captain Reynaldo Severino, las-12:00 kaina sang udto sang natabo ang aksidente sa Barangay Pacol syudad sang Bacolod.
Gikan sa syudad sang Bacolod ang ceres nga gina-maneho ni Almer Paro sang Barangay Camindangan, Sipalay City kag pasulod na kuntani sa Crossing Pili sa nasambit nga barangay.
Sa inisyal nga pag-usisa kay Paro, mahinay lang ang iya padalagan kag sang nag-preno na ini hinali na lang nga daw ginhabyog ang bus, nagtiyog-tiyog tubtob nga ini ang natumba.
Nag-dangat sa 31 ang gindala sa Bago City District Hospital samtang ang iban naman ang gindala sa syudad sang Bacolod.
Halos indi naman makilal-an ang napatay nga si Anna Mae Declaro, 28 anyos bangud sa mga pilas nga naangkon sini sa iya nga ulo.
Suno sa amay sang biktima nga si Elmer Declaro, gikan sa syudad sang Bago ang biktima upod ang iya iloy nga si Mae kag ang manghod sini nga 12 anyos kag papauli na kuntani sa ila balay sa Don Jorge Central Ma-ao sang natabo ang aksidente.
Gilayon naman nga nag-padulong sa syudad sang Bago ang media relations officer sang Vallacar Transit nga si Jade Seballos agud asikasuhon ang medical assistance para sa mga pasahero nga pilason.
Date of airing: April 15, 2019
