Patay ang isa ka driver matapos nagbunggu-anay ang duha ka mga motorsiklo sa Barangay San Miguel, La Carlota City sang Marso 3.
Ang isa ka motorsiklo ang ginamaneho ni Keith Rezin, 26-anyos, lalaki, kag ang iya back rider amo si Allysa Marie Jusal, 26-anyos, babaye, kag lunsay residente sa nasambit nga lugar.
Samtang ang ikaduha nga motorsiklo ang ginamaneho ni Edilberto Pamatia-an Jr, 38-anyos, kasado, kag ang back rider niya ginkilala nga si Fatima Yvonne, 15-anyos, estudyante, kag residente sang Brgy. Balaring ciudad sang Silay.
Sa imbestigasyon sang La Carlota City Police Station, ang motorsiklo nga ginamaneho ni Rezin ukon ang Vehicle 1 ang halin sa Barangay Ara-al padulong Barangay San Miguel kag gulpi nga nagliko padulong sa nawala nga direksyon kag nagresulta sa pagkabunggo sa motorsiklo nga ginamaneho ni Pamati-an ukon ang Vehicle 2 nga nagabiyahe sa pareho nga direksyon nga tinutuyo kuntani mag-overtake sa Vehicle 1.
Bangud sini, natumba ang apat ka mga persona nga sakay sa duha ka motorsiklo kun sa diin nalampos ang ulo ni Pamati-an sa steel bar sa dalan nga gintuna-an sang kamatayon sini.
Lunsay nga wala nagasuksok sang helmet ang mga sakay sang motorsiklo nga naaksidente.
Gilayon naman nga ginbulong ang mga nasamaran samtang ginahulat naman ang desisyon sang pamilya sang nagtaliwan natuhoy sa nagluntad nga aksidente.
