BACOLOD CITY — Isa ang pilason matapos nasunog ang isa ka balay sa Regent Pearl Homes, DC 3, Barangay Alijis, ciudad sang Bacolod kagab-i.
Partially-burned ang duha ka panalgan nga balay ni Guerrero Garcia sang ini ang nasunog pasado alas 6:30 sang gab-i kag alas 7:33 na nadeklarar sang Bureau of Fire Protection nga fire out.
Suno kay Fire Chief Inspector Publio Ploteña, city fire marshal sang Bacolod, wala sa puluy-an si Garcia kag nabilin diri ang iya misis nga si Isabelita kag mga apo.
Halin sa 2nd floor si Mrs. Garcia rason nga nakaangkon ini sang paso antes siya nakagwa sa balay.
First degree burn ang naagom sini apang yara naman sa estable nga kondisyon.
Suno kay Ploteña, indi magnubo sa 100 mil pesos ang balor sang halit nga gintuga sang sunog apang ginatumod pa ang ginhalinan sang kalayo.
Nahibaluan nga may edad na ang mag-asawa nga Garcia.
Maswerte naman nga wala naglaton ang kalayo bangud may yara sang fire wall.
