Isa ang pilason sa sunog nga nagluntad sa Purok Sunrise, Barangay Taculing, Bacolod City subong nga hapon samtang ginatumod pa tubtub subong ang numero sang mga balay nga ginlamon sang kalayo.
Sa pahayag sang mga residente sa lugar, apat ka mga balay ang ginlamon sang kalayo.
Ang mga balay ang kalabanan human sa light materials kag ginabug-usan sang masobra 20.
Suno sa mga residente, ginapatihan nga nagsugod ang sunog sa nakasindi nga kandila sa balay nga yara sa tunga sang lugar.
Ginapatihan nga gindakop sang kalayo ang kurtina.
Madasig naman nga nagdabadaba ang kalayo bangod human sa light materials ang kadam-an sang mga pamalay nga nagatapik sa isa kag isa kag may-ara ini sang kurtina kag mga sako nga nagpakusog pa gid sang sunog.
Gilayon naman nagbululigay ang mga pumuluyo nga nagbitbit sang mga balde sa pagpalong sang kalayo bangud mabudlay ang pagpenetrate sang mga bombero sa lugar.
Samtang napilasan naman ang residente sa lugar nga ginkilala kay Joanne Tordillos, 38 anyos matapos nga tinguhaan nga masalbar ang pila ka mga gamit sa iya nga puluy-an.
Suno naman kay Delfina Acosta, residente sa lugar, nagbakal sa iya tyangge sang kandila ang isa ka bata sa ginhalinan sang sunog.
Ginsindihan sini ang kandila para sa nagtaliwan nga himata.
Apang 30 minutos matapos sang pagbakal sini sang kandila, nagluntad ang sunog.
Suno pa kay Acosta, nasunugan naman ang lugar sang tuig 2015.
