Tubtob sa karun, wala pa sang may nakapalapit sa Bacolod Police Station 10 nga pamilya para mag-claim ukon maglantaw kun ila himata ang duha ka bangkay nga nasapwan sa sulod sang tamburong sa bag-ong dalan, sa Barangay Felisa, Bacolod City sang Abril 30.
Sa interview sang Bombo Radyo kay Police Major Richard Fajarito, station commander sang Bacolod Police Station 10, nagkoordinar na ini sa tanan nga estasyon sang Bacolod City Police Office kun may yara sang narecord nga namissing, apang wala man.
Suno diri, dako ang posibilidad nga masobra sa duha ka persona ang suspetsado sa pagpatay sa duha ka biktima.
Wala man sang CCTV sa area bangod nga wala sang panimalay kag kampo ang yara sa pihak kag pihak nga bahin sang dalan.
Nagpanawagan si Fajarito sa publiko kun sin-o man ang may pamilya nga wala nakapauli kag wala nahibaluan kun diin ukon namissing nga makig-angot sa ila.
Samtang, padayon pa nga ginahulat ang resulta kun babayi ukon lalaki ang isa ka bangkay nga nagaka-agnas na, samtang positibo naman nga lalaki ang isa.
