BACOLOD CITY – May kaso nga theft ukon pagpangawat ang isa sa duha ka mga anay katapo sang Abu Sayyaf Group nga naarestar kag nakuhaan sang granada, armas kag mga bala sa Barangay E. Lopez, ciudad sang Silay sadtong Myerkules.
Ini ang impormasyon nga nakalab-ot kay Police Supt. Willy Diel, ang hepe sang Silay City Police Station, kun sa diin karon nahunong sanday Absner Kudarat alyas Abu Ben Rafi, 29-anyos, sang ciudad sang Isabela, probinsiya sang Basilan kag iya bayaw nga si Saldy Abebolah alyas Starring, 25-anyos kag residente man sang amo nga lugar.
Suno kay Diel, base sa impormasyon nga ginpalab-ot sa iya gikan sa Police Regional Office 18, si Kudarat ang may kaso nga theft sa probinsiya sang Iloilo apang iya pa tsekyaron kun may standing warrant of arrest batok sa iya.
Nahibaluan nga base sa imbestigasyon sang kapulisan, gikan sa Basilan nagpadulong sa Palawan si Kudarat kun sa diin ini nakapangasawa sang isa man ka Muslim apang nagpadulong sa Iloilo kun sa diin ini nagtiner.
Nagpadulong ini sa Negros Occidental kun sa diin may live-in partner ini sa ciudad sang Silay.
Ginpahayag nga ginhagad sini nga magpadulong diri ang iya bayaw nga si Abebolah agud magtrabaho sa construction.
Samtang, sa bahin naman sang Philippine Army, ginpahayag ni 303rd IB Commander Col. Eliezer Losañes nga nakapakig-angot na sila sa army units sa Mindanao kun matuod ang pahayag nanday Kudarat kag Abebolah nga madugay na sila nagbiya sa ASG.
Ini bangud base sa ginpatigayon nila nga pag-interogar sa duha, lunsay mga kilala nga mga personalidad ang ila ginahinambit kaangay ni anay ASG leader Abu Sabaya.
Una na nga nagkuha sang dugang nga impormasyon gikan sa mga arestado ang mga katapo sang Military Intelligence Group (MIG) sang Philippine Army.
Sa karon, ginatugyan na sang Philippine Army sa Silay City Police Station ang paghunong sa duha matapos sila makuhaan sang granada, mga armas kag mga bala sa balay sang live-in partner ni Kudarat sa Barangay E. Lopez, ciudad sang Silay, tinalikdan nga Myerkules.
