Wala sa gihapon sang identity ang isa sa duha ka mga lalaki nga nasapwan nga wala na sang kabuhi sa higad sang dalan sa Purok Talutog, Barangay Dulao, ciudad sang Bago, sang Biyernes.
Sa interview sang Bombo Radyo kay Police Staff Sgt. Armando Arao, imbestigador sang Bago City Police Station, may pamilya nga nagpadulong sa punerarya para kilalahon ang isa ka biktima apang negatibo ang resulta.
Suno diri, magka-anggid lamang ang features sa himata sang pamilya nga nagpadulong apang sang gintsekyar ang mga palatandaan kaangay sang birthmark, wala sang may nakita sa biktima.
Ini ginpadulongan sang pamilya bangod may yara sila sang himata nga nagatrabaho sa Bacolod nga wala na nagapauli sa ila kag nagakomunikar.
Samtang ang isa naman ka biktima ang ginkilala kay Edward Pille, 29 anyos, residente sang Bangga Yap, Barangay Alijis, Bacolod City kag may isa ka anak nga nagaedad sang tatlo ka tuig.
Nadakpan na sadto si Edward sa drug buybust operation sa ciudad sang Bacolod apang nahilway na.
Suno kay Arao, ila pa ginavalidate nga may yara sang record sa kaso nga frustrated homicide.
Madumduman nga sang Biyernes nasapwan ang duha ka bangkay sa higad sang dalan sa Purok Talutog, Barangay Dulao, ciudad sang Bago kun sa diin lunsay nga nahigtan sang masking tape ang mga kamot kag tiil sang mga ini samtang nakaputos man sini ang nawong kun sa diin mata na lamang ang makita.
Dugang pa nga wala sang gunshot wound ukon stab wound sa mga bangkay, kundi may ara lamang sang mga lagob sa lawas, apang parehas naman nga may hugot nga nakakuga nga level hose nga gamit sa construction ang ila mga liog.
