Ginkumpirmar sang deputy chief of police sang Silay City Police Station nga ginhingagaw nila asikaso kahapon ang mga papelis kag supporting documents agud nga mapasaka ang kaso batok sa mga suspek nga nagtiro sang kaugalingon nila nga tiya sa Sitio Beranio, Brgy Lantad, ciudad sang Silay, Negros Occidental.
Ang biktima ang ginkilala nga si Jossie Mondejar, 54 anyos, nagapautang sang kwarta samtang ang mga suspetsado naman amo ang mga hinablos sini nga 18 anyos kag isa ka estudyante, kag ang magulang sini nga si Aljun Bitalac, 29 anyos, kasado, kag Intel Officer 1 sang Philippine Drug Enforcement Agency (PDEA), lunsay mga residente sang nasambit nga lugar.
Sa interview sang Bombo Radyo Bacolod kay Police Major Sarah Villanueva, ginhingagaw nila kahapon ang pagproseso sang mga kinahanglanon nga papelis agud nga mapasaka ang kaso nga murder batok sa mga suspek.
Subong nga adlaw ginabantaw nga ipasaka na ang kaso batok sa mag-utod.
Samtang, indi naman ang service firearm sang intel officer sang PDEA ang gingamit sa krimen.
Ginpahayag man ni Villanueva nga wala na naghatag sang pahayag ang mag-utod bangud ang legal counsel na nila ang mahatag sang statement.
Madumduman nga ginatudlo nga rason sang pagpatay sang mga suspek sa biktima amo ang away sa duta.
Nahibaluan nga ang 18 anyos ang nagtiro sa biktima kag ang intelligence officer sang PDEA ang nagserbe nga look-out.
