Nagtaliwan na ang isa sa duha ka biktima nga ginsungay sang karbaw sa Purok Totong 3, Brgy. Felisa, ciudad sang Bacolod, sang Setyembre 3, sang aga.
Ginkilala ang mga biktima nga sanday Belinda Villanueva, 55 anyos, balo kag Christian Bolanon, 26 anyos Soltero lunsay residente sang nasambit nga lugar.
Nagapangkuha sang tangkong si Villanueva sang ginpalapitan ini sang karbaw kag hinali nga ginsungay.
Nakaagom ini sang samad sa agtang, sa tiyan kag sa kinatawo sini kag sa iban pa gid nga bahin sang iya lawas.
Gindala sang rescue sang Barangay Felisa si Villanueva sa hospital apang sang nakabalik na ang ambulansya ginsungay naman sang karbaw si Bolanon matapos nga may ginkuha.
Ang karbaw ang ginapanag-iyahan ni Elizalde Libo-on nga residente man sang nasambit nga lugar.
Sa interview sang Bombo Radyo kay Police Captain Sherwin Galpar, bag-o nga station commander sang Bacolod Police Station 10, gindala na ni Libo-on ang karbaw sa slaughter house para ipa-ihaw kag gamiton ang kwarta bulig sa duha ka biktima.// Nagtaliwan ang biktima nga si Villanueva samtang si Bolanan naman ang padayon nga nagarecover sa ospital.
