Ginpahayag sang kongresista kag isa sa mga author sang Negros Island Region Act ukon RA 12000 nga kinamatarong sang mga petitioners ang pagfile sang petition sa Korte Suprema agud nga mapunggan ang pagpatuman sang nasambit nga layi.
Madumduman nga sang Biyernes, anum ka mga residente sang Negros Oriental kag Siquijor ang nagfile sa Korte Suprema sang petition agud nga mapunggan ang pagpatuman sang Republic Act 12000 ukon ang Negros Island Region Act kag ideklarar nga unconstitutional.
Suno kay Negros Occidental 6th District Representative Mercedes Alvarez, kinamatarong sang anum ka mga petitioners nagikan sa Negros Oriental kag Siquijor nga magfile sang petition agud nga kwestyunon ang NIR Act.
Gin-athag man ni Alvarez nga ang tanan nga procedure ang ginsunod gani hingyo sang kongresista nga mahatagan nalang sang kahigayunan nga mahuman ang Negros Island Region.
Panindugan sini nga ginsunod nila ang mga pagsulundan kag wala na nagakinahanglan sang plebiscito, bangud wala man sang gindihon nga bag-o nga Local Government Unit.
Dugang pa sini, ang NIR ang isa ka administrative aspect sang governance.
