Nagpasalig ang isa ka biktima sang ginaalegar rice investment scam sa Bacolod sa iya mga downline nga bayaran niya ang mga ini ilabi na ang mga naaresto kag wala gid naulian ang ila kwarta nagikan sa mga suspetsado nga sanday Jennifer Nierves kag Krizia Rhea Gonzaga.
Madumduman nga sang tinalikdan nga semana, nagpadulong sa Bacolod Police Station 2 ang pila ka mga biktima sang rice investment scam kun sa diin ginpromisahan ang mga ini nga kun mag-invest, makaginansya sila sang 10% sa sulod lang sang tatlo ka adlaw apang matapos ang pila ka bulan, may mga delays na kag wala na sila sang may nabaton.
Kahapon, nagpadulong sa estasyon sang Bombo Radyo si Jan Camille Albito, biktima man sang nasambit nga scam apang may mga downline ini ukon mga napasulod nga investors gani mangin siya ang naulamid kag napasakaan sang kaso sa National Bureau of Investigation.
Suno kay Albito, ginreklamo ini sang iya downline nga si Michelle Sales kag gindala na ang claims sa prosecutor bangud nakainvest ini sang kabug-usan nga P2.9 million halin sang Hunyo 6.
Suno sa iya, masobra P3 million na ang nauli kay Sales apang luyag sini gihapon nga makuha ang P2.9 million bangud nagapati ini nga ginansya lang ang P3 million kag wala pa nakuha ang capital.
Panindugan naman ni Albito nga ang kwarta nga iya nagakabaton nagikan sa mga investors ang direkta niya nga ginahatag kay Jennifer Nierves kag nanabon man ini bangud iya ginbayaran ang iban sini nga mga downlines.
Suno sa iya, mas luyag sini nga bayaran ang mga investors nga iya napasulod nga naaresto gid ukon ang mga wala gid nakabaton sang kwarta bangud sila ang nagakinahanglan.
Suno diri, siya mismo ang naintuan man bangud masobra P5 million man ang iya nga nainvest gani kun bayaran ini sanday Jennifer kag Krizia, iya ini batunon agud ipamalik man sa iya mga downlines apang kun indi gid sini makuha ang kwarta, mangabudlay ini sa pagtrabaho agud mabalik ang kwarta sang iya mga napasulod bangud luyag sini nga mangin responsible.
Luyag man sini nga may legal nga magapatunga sa ila ni Sales nga may kinaalam kun pila gid man ang iya dapat ibalik nga kwarta diri.
Suno sa iya, wala gid ini naglaom nga scam ang iya nasudlan bangud abi sini nga ginaginansyahan lang ang bugas kun sa diin sila nagainvest.
Si Albito ang nagapanag-iya sang isa ka wholesale kag retail shop gani nagapati ini nga mahapos lang batakon ang kwarta nga iya napierde sa nasambit nga scam.
