Patay ang isa ka 12 anyos nga lalaki matapos nga gintiro sang wala pa nakilala nga suspetsado sa Locsin-Cuadra Streets, sa Barangay 12, Bacolod City, sa tabok sang Bacolod City Public Plaza alas-2:40 kaina sang kaagahon.
Ang 12 anyos nga biktima nga ginkilala nga si Dean Rod Cepeda ang ginaalegar may diperensya sa paminsaron.
Sa impormasyon nga natipon sang Bombo News Team, ang biktima ang nagatulog sa corner sang Locsin-Cuadra Streets sang ginpalapitan sang nakahelmet nga suspect kag ginluthang.
Ginapahayag man nga antes paman, nakit-an na ang suspect nga sakay sa motorsiklo kag nagasunod-sunod sa biktima kag kaangay nga ginhulat lamang nga mag-isahanon antes ginhimo ang krimen.
Isa lamang ka lupok ang nabatian, kun sa diin ang biktima ang nakaangkon sang iga sang bala sa ulo.
Sa interview sang Bombo Radyo Bacolod kay Alyas Tina, iloy sang biktima, ginkumpirmar sini nga isa sa duha ka mga lalaki nga gin-updan ni Danica, ang 5-year-old girl nga namissing sa Purok Water Lily, Barangay Zone 10, Talisay City sang Hulyo 1 kag Hulyo 2 sang kaagahon na nakit-an sa La Salle Avenue, Barangay Villamonte, Bacolod City.
Suno sa iloy, ang iya bata ang ginasugo-sugo ni Makoy, ang ginpriso sa Talisay City Police Station kag ginkasuhan sang abduction bangud sa paghagad kay Danica nga mapadulong sa Bacolod.
Si Dean Rod ang ipaidalum pa kuntani sa neurological test agud matumod kun ini ang matuod nga mentally ill.
Sa tion nga mapamatud-an nga may deperensya sa paminsaron, ini ang magapabilin sa luyo sang iloy, samtang kun wala sang mental illness, ini ang isulod sa institusyon sang Department of Social Welfare and Development (DSWD).
Suno diri, ginadala-dala ni Makoy si Dean Rod sa pagpangawat sa nanarisari na nga lugar sa ciudad sang Bacolod, kag ini ang ila ginasaway man apang ginamanipulate ni Makoy.
Panindugan sang iloy nga makitaan sang sintomas sang mentally retarded illness ang iya bata bangod apisar 12 anyos na, ini ang nagababy talk gihapon.
Ini ang gintanyagan naman nga magtinir sa balay kag hatagan lamang sang kwarta para sa pagcomputer, apang ini ang wala man nagapati kag nagalayas-layas.
Indi man sini maseguro kun nagarugby ang iya bata bangod wala paman sini makita nga nagagamit.
Panawagan sini nga siya ang mabuligan nga mahatagan sang hustisya ang kamatayon sang iya bata.
