Ginpasakaan sang kaso nga abduction ang isa sa nagtaban sa 5 ka tuig nga bata nga babayi gikan sa Talisay City padulong sa ciudad sang Bacolod.
Sa interview sang Bombo Radyo Bacolod Police Captain Welma Silva, Public Information Officer sang Negros Occidental Police Provincial Office, ginfile na sa Talisay City Prosecutor’s Office ang kaso nga abduction may kaangtanan sa Republic Act 7610 ukon Child Protection Act matapos matumod nga 18 anyos na ang isa sa duha ka mga suspect.
Madumduman nga gintanyagan sang mga suspetsado ang mga nagahampang nga kabataan sa Purok Water Lily, Brgy. Zone 10, Talisay City sang dulse apang nagdalagan ang iban nga kabataan samtang ini ang ginbatun naman ni Danica kag nag-upod sa duha.
Ang mga nagtaban ang natumod nga mga masami nagatambay sa Provincial Capitol Lagoon, kag ini ang ginpost sa social media.
Bangod sa pagbinuligay sang mga concerned citizen nahimo nga marecover ang bata sa atubang sang Capitol Ville Subdivision sa Barangay Villamonte, Bacolod City alas-2:30 kahapon sang kaagahon.
Ang isa ka minor ang naturn over na sa iya pamilya, samtang nagpakuno-kuno man nga minor ang isa pa, apang natumod nga ini ang 18 anyos na.// Ginalantaw nga wala man ini ginclaim sang pamilya bangod ang ginikanan sini ang gina-alegar notorious man nga kawatan sa ciudad sang Bacolod kag mainit man sa mga kapulisan.
Samtang ipaidalum man sa psychological examination sang Department of Social Welfare and Development (DSWD) ang minor kun ini ang may deperensya sa paminsaron.
Sa pihak nga bahin, ang masobra 40 anyos nga una na-involve sa insidente ang natumod nga nagbulig lamang sa pagpangita, kag ini ang gilayon man nga ginrelease.
Sa pihak nga bahin sa pagtsekyar sang Bombo News Team sa bata, ginpahayag sang amay sini nga si Darell Sison nga ginaproseso na nila ang mga papelis sa pagpasaka sang kaso.
Samtang ginahulat paman sang mga ini ang resulta sang ginpatigayon nga medico legal.
Ginpasalig man sang amay nga maayo ang kahimtangan sang bata kag wala man nakitaan sang trauma kag wala man sang may ginabyag nga sakit sa lawas.
