Nakilal-an na ang isa sa mga suspek nga nagluthang-patay sa driver sang Cosmopolitan Christian Church sa Brgy.Taculing, Bacolod City, sang Agosto 24.
Madumduman nga ginluthang ang biktima nga si Efren Banaglorioso sa atubang sang simbahan apang nakapalagyo ang mga suspek sakay ang itom nga Montero.
Sa interview sang Bombo Radyo Bacolod kay Police Col. Joeresty Coronica, may duha ka witness nga naghatag sang identity sang drayber sang salakyan.
Suno diri, ang suspek nakilal-an matapos nga nakit-an ang getaway car nga ila gingamit nga ginbilin sa banwa sang Salvador Benedicto sang Setyembre 1.
Didto natumod nga ang salakyan ginparentahan sang tag-iya sa isa ka lalaki kag ang lalaki nga nagrenta ginpahulam ang salakyan sa iya himata.
Suno kay Coronica, kun madugay ang pagproseso sa krimen kag wala sang development bisan indi interesado ang pamilya Banaglorioso nga magpasaka sang kaso mismo ang kapulisan ang maggiyo para mapasakaan sang kaso ang mga suspek.
