Ginalantaw nga motibo sa pagpatay sa 20 anyos nga Grade 11 student, amo nga gina-alegar nga pagpanghimulos sa menor de edad nga bata sang isa sa suspetsado.
Ang insidente nagluntad kapin alas- 7:00 sang gab-i sang Dominggo sa Granada Heights Subdivision sa Barangay Granada, Bacolod City.
Nagahampang ang bi bilyaran sa gwa sang ila balay ang biktima nga si Nicus Balagusa, sang may nagdulog nga pula nga Toyota Vios kag naggwa ang duha ka lalaki bitbit ang armas luthang.
Gilayon man nga nagdalagan ang estudyante pasulod sa ila balay kag nagderetso sa kwarto, apang ginsundan ini sang suspetsado kag ginsipa ang piertahan sang kwarto tubtob nga mabuksan.
Gintiro sang suspetsado si Balagusa sang apat ka beses sa dughan kag paa samtang yara man sa sulod sang kwarto ang mga ginikanan sini.
Nakilal-an naman sang amay sang biktima ang suspetsado nga amo si Carlito “Dondon” Tongho, amay sang abyan nga babayi sang iya nga bata.
Sa interview sang Bombo Radyo Bacolod kay Police Captain Portia Nillosan, station commander sang Bacolod Police Station 5, nagpalapit sa ila para magreport si Tongho sa gina-alegar nga ginhimuslan ang ila nga bata nga menor de edad.
Apang, gin-withhold sang kapulisan ang report samtang indi pa mapamatud-an ang natabo, kag ini naman ang ginpanginwala ni Balagusa.
Suno kay Nillosan, lima tanan ang suspek, isa ka drayber, duha ka look out kag duha nga nagsulod sa balay sang biktima lakip na diri ang amay sang menor de edad nga babayi nga gina-alegar ginhimuslan ni Balagusa.
Sa karun padayon sa gihapon ang hot pursuit operation sa mga suspetsado.
