Tumandok sang Silay City, Negros Occidental ang isa sa mga ginatudlo nga suspek sa pagpatay kay Negros Oriental Governor Roel Degamo kag walo ka iban pa.
Siya ang ginkilala kay Ricky Velle Espe, former member sang Philippine Marines kag nag-Absent Without Official Leave (AWOL) sang 2016.
Si Espe ang naaresto sa Amlan, Negros Oriental sa sulod sang gina-arkilahan nga balay.
Narekober sang mga otoridad ang pila ka mga high powered firearms, sniping gear kag ammunitions kasubong man ang pila ka mga plaka sang mga salakyan.
Ang asawa sini ang active member sang Philippine Marines kag sila ang may duha ka anak apang tatlo ka tuig naman nga wala ang mga ini sang contact sa isa kag isa.
Sa exclusive interview sang Bombo Radyo sa pamilya ni Espe, nakibot ang mga ini nga nadalahig ang ila nga anak sa natabo nga pagpatay kay Governor Degamo bangud naglisensya ang ila nga anak nga magatrabaho ini bilang security guard kag driver sang isa ka VIP.
Wala man ang mga ini nakahibalo kun sin-o ang gintrabahuan sang ila anak bangud boss lamang ang ginahambal sang ila anak.
Sang Domingo lamang sila nakahibalo sang pagkadakop sang ila nga anak.
Ginpanugyanan pa sang amay ang iya anak nga siguruhon sini nga legal ang iya trabahuan bangud mabudlay magpangabuhi sa trabaho nga illegal.
Suno kay Tatay Toto, indi sini matuod nga pangalan, nagserbe ang iya anak sa Philippine Marines sa sulod sang napulo ka tuig apang nag-AWOL bangud naglainay sila sang buot sang iya official bangud nabudlayan ini magpa-enlist para sa promotion bangud sa mga tattoo sini sa iya lawas.
Matapos nga mag-AWOL wala na ini sang trabaho, apang nangin driver man ini sang ambulansya sang Silay City apang nag-untat man matapos maaksidente.
Nagbiyahe man ini sang ila tricycle antes pa man nagpadulong sa Manila agud mangin security apang wala nakahibalo ang pamilya kun ano nga ahensya ang ginsudlan.
Suno sa amay, may pagkasuplado lamang ang ila nga anak apang wala ini sang kontra sa ila nga palibot bangud maayo ini makisama.
Nangin miyembro man sang Dragon Boat Team kag nagaorganize man ini sang mga basketball teams sa ila lugar kag kun wala ini nadalahig sa mga gintudlo nga suspek sa Pamplona massacre, magacoach ini sa senior team sa ila barangay.
Wala man naglaom ang amay nga ang iya anak ang kabahin sang isa ka grupo nga nagpatay sa gobernador sang Negros Oriental.
Panawagan sini sa mga otoridad nga imbestigaran sang maayo ang pagkadalahig sang ila anak kag dapat wala sang dampigan ang mga ini sa pag-imbestigar.
Bilang ginikanan, masakit man apang batunon nila ang natabo kun ang ila anak ang matuod nga nakasala.
Suno sa amay may Diyos man nga nagalantaw kag nagapangabay ini nga ang kamatuoran ang mangibabaw sa imbestigasyon sa natabo nga massacre kun sa diin imbulbado ang iya nga anak.// Ulihi sang mga ini nga contact sa ila anak sang nangayo ini sang kwarta bangud wala ini sang allowance.
