Napatay ang isa sa mga suspetsado sa luthang-patay kay Negros Oriental Governor Roel Degamo kag walo ka mga sibilyan sa pagpatigayon sang joint hot pursuit operation sang mga katapo sang Philippine National Police kag Philippine Army.
Ini ang ginkumpirmar paagi sa press release nga ginpagwa ni Police Lt. Col. Gerard Ace Pelare, tagpamaba sang Special Investigation Task Group nga gintukod agud magpatigayon sang maid-id nga imbestigasyon sa massacre.
Suno kay Pelare, ang suspetsado nga wala pa na-identify ang napatay sa bahin sang Bayawan City.
Paathag sini nga nagapanago sa isa ka plantation ang suspetsado kapin ala-1:30 sang kaagahon ang hinali nalang nga nagpalupok sa ila, gani nagbalos man sa pagpalupok ang mga otoridad nga nagresulta sa kamatayon sang suspetsado.
Sa pihak nga bahin, tatlo naman ang nahimo nga madakpan nga ginkilala kanday Joric Labrador, 50-anyos, isa ka anay army, residente sang Cagayan De Oro; Jover Aber, 42-anyos, ex-army ranger, residente sang Barangay Robles, La Castellana, Negros Occidental; kag Benjie Rodriguez, 45-anyos, residente sang Mindanao.
Dugang pa ni Pelare nga ang isa ka anay militar ang may kaso may kaangtanan sa iligal nga droga samtang ang isa pa ang absent without official leave (AWOL).
Sa pihak nga bahin, antes paman natabo ang engkwentro, una nila nga ginpangita ang mga armas luthang kag iban pa nga battle equipments sa Barangay Cansumalig sa banwa sang Bayawan.
Suno kay Pelare, gintago sang mga suspetsado ang mga battle equipments kag isa na lamang ka short firearm ang dala sang mga ini sang sila ang nadakpan.
Narecover sang mga otoridad ang apat ka bandolier, isa ka rifle case, duha ka combat uniforms, tatlo ka pares sang combat shoes, mga magazines kag bulletproof vest.
Ginapreparar na sang mga ini ang mga ebidensya kag dokumento para sa pagpasaka sang kaso.
