Nagpanindugan ang isa sa tatlo ka suspek sa pagpatay sa 51 anyos nga si Tony Lazaga nga manunudlo sa Binalbagan Catholic College nga wala ini sang sala sa pagpatay sa biktima.
Sa interview sang Bombo Radyo kay Johnrey Castino alyas Jansen, 19 anyos kag residente sa Purok Apitong, Barangay San Teodoro, Binalbagan, kaupod sini nga sanday John Paolo Fernandez kag Jonathan ang mismo nagplano sang tanan samtang siya naman ang ginhagad lang.
Suno diri, nagatambay sila sang naglabay si Lazaga kag ini ang ila ginsundan.
Ginsinggitan ni Jonathan si Lazaga kag gindalagan kag amo nga gintutukan sang patalum.
Nagbato si Lazaga, kag iya ginhampak sang payong si Jonathan sa ulo, apang siya ang ginbuno kun sa diin nag-agom ini sang 16 ka pilas sa nagkalain-lain nga bahin sang lawas.
Pahayag ni Castino, malayo ini sa duha niya ka kaupod kag sang nabatian nga nagsinggit nga nangayo sang tabang si Lazaga amo na lamang nga nagdalagan ini palapit.
Sang nakita sini ang natabo, nagrattle ini kag wala nakahibalo sang himuon.
Siya ginsinggitan sang iya kaupdanan nga kuhaon ang nagkaladagdag nga gamit ni Lazaga samtang si Fernandez ang nagahakos diri kag si Jonathan ang nagabuno.
Pahayag ni Castino, ang cellphone kag masobra P300 nga kwarta ni Lazaga ang yara sa duha sini ka upod.
Una nga nalagyo si Castino samtang nagasunod man dalagan palagyo sanday Fernandez kag Jonathan kun sa diin nakita pa ni Castino nga nagatindog pa si Lazaga.
Nagpauli si Castino kag amo nga ginsugid sa iya iloy ang natabo kag ang iloy sini mismo ang nagpalapit sa Binalbagan Municipal Police Station.
Samtang, suno naman kay Negros Occidental Gov. Eugenio Jose ‘Bong’ Lacson, wala sang sin-o man ang may nagakaangay nga bun-on gani luyag sini mahibaluan kun ano ang rason kun ngaa 16 gid ka pilas sang pagpamuno ang ang ginhimo sa manunudlo.
