Ginserbihan na sang warrant of arrest ang isa sa duha ka mga kaupod ni Punong Barangay Arnie Benedicto sang Brgy Lantad, nga suspect sa strafing incident sa Brgy Mambulac, Silay City, kadungan sa eleksyon sang Mayo 12, 2025.
Madumduman nga sadto ginbantayan sang volunteers sang Team Ugyon ang nagaserbe nga meeting place sang mga miyembro sang Team Asenso, bangod sa alegasyon sang vote buying.
Apang akig nga naggwa sa balay si Benedicto kag ginpangluthang ang mga tawo sa palibot, kaupod sang duha pa ka suspect, nga nagresulta sang duha ka napatay kag pito nga napilasan.
Si Benedicto ang bpluntaryo nga nagsungka sa Negros Occidental Criminal Investigation and Detection Group (CIDG), apang wala naman nadakpan ang duha ka suspect.
Naggwa ang warrant of arrest sang Abril 16, 2026 para sa kaso nga 6 counts of frustrated murder kag 2 counts of attempted murder.
Sa ginpatigayon nga manhunt charlie operation sang Silay City Police Station kahapon batok sa most wanted person, natigayon nga madakpan si Alyas Jose, 32 anyos, kasado, wala sang trabaho, residente sang Hacienda Grande, Brgy Robles, La Castellana.
Ang suspect ang ginarekomendahan sang P1,440,000 nga bail bond.
