Ginpahayag sang hepe sang Escalante City Police Station nga nadakpan sa isa ka ospital sa Sagay City ang isa sa nagbato sa otoridad sa engkwentro nga nagluntad sa Sitio Napungalan 2, Brgy. Jonob-jonob, Escalante City sang Abril 15.
Madumduman nga nagluntad ang engkwento sang ginsrebehan sang otoridad sang warrant of arrest ang ginakabig nga drug group leader nga si Joseph Moso Bindoy apang nagbato ini nga nagresulta sa iya kamatayon.
Samtang may duha pa gid nga napatay matapos nga nagbato man nga amo sanday Piolo Morning Regodos, residente sang brgy Malasibog; kag Roy Bagayo Manija Jr., residente sang brgy Jonob-Jonob, Escalante City.
Sa interview sang Bombo Radyo Bacolod kay Police Lt Col Florendo Fajardo, hepe sang Escalante City Police Station, may isa nga nakapalagyo kag nagpadulong sa ospital sa Sagay City para mangayo sang bulig.
Suno diri, nakig-angot ang Sagay City Police Station sa ila sang mahibaloan nga may pilas sang pagpangluthang ang nagpalapit sa ospital.
Nagpadulong sila sa ospital kag nakumpirmar nga kaupod sang tatlo ka mga napatay sa engkwentro ang nakapalgyo nga si Tony Mahinay.
Suno kay Fajardo, naka-angkon ini sang pilas sa natoo nga tiil kag kamot kag padayon nga ginabulong samtang napaidalom sa hospital arrest sa ciudad sang Bacolod.
Pahayag sini, nga si Mahinay ang nadakpan sadto sa drug buy bust operation apang nakapalagyo kag sila ang magkaaway ni Bindoy sa transaction sa illegal nga droga apang sang ulihi nagtingob sang pwersa ang duha.
