Nakilal-an na ang isa sa mga suspetsado nga nagluthang sa katapo sang Philippine Army sang kaagahon sang Enero 4 sa Purok San Roque, Brgy. Handumanan, ciudad sang Bacolod.
Nahibaluan nga ang biktima nga si Jasper Romas Gancia, 34 anyos, residente sang Brgy. Bata, Bacolod City, nga assigned sa 8th Scout Ranger Camp Ranao, Marawi City ang napilasan sa likod kag tiil nga padayon nga nagapabulong sa ospital.
Sa interview sang Bombo Radyo Bacolod kay Police Captain Lelanie Laguting, station commander sang Bacolod Police Station 10, ang insidente nagluntad alas 12:20 sang kaagahon, kun sa diin naggwa ang amay sang nobya ni Gancia nga si Teodoro Tuvilla, 70-anyos para magbakal sang sigarilyo.
Nasugat-an ni Teodoro ang tatlo ka mga suspetsado kag namangkot ini kun sa diin siya mahimo nga makabakal sang sigarilyo apang siya ang ginsabat sang pabalang.
Hinali na lang nga may nagluntad nga argumento kag amo na nga naggwa si Gancia apang hinali lang ini nga ginluthang sang mga suspetsado.
Nag-abot man ang nobya sini kag siya ginpatindog kag gindala pabalik sa apartment apang sila ginlaot sang pagpangluthang sang suspek kun sa diin naigo man sa kamalingking nga tiil ang nobya ni Gancia.
Nagkuha si Gancia sang service firearms sini sa sulod sang apartment apang ini pa ginsundan sang suspek.
Nahimo man nga gintayaan sang suspek sang armas-luthang ang nobya ni Gancia apang ini naghambal nga indi lang siya pagdalahigon.// Bangod nga naatubang sang nobya ang suspek, amo nga 100 porsyento sini nga ginkilala.
