Ginpakigbahin sang isa sa mga bar passers subong nga tuig 2024 ang iya nga journey.
Sa interview kay Atty. Bea Erespe Singuay, siya ang naggraduate sa University of Negros Occidental Recoletos-School of Law sadtong 2021.
Siya ang nagaisahanon nga bata sang journalist kag retired police.
Suno kay Singuay, wala ini nakapasar sa una kag ikaduha sini nga pagkuha sang bar exam.
Sa ikatatlo nga pagkuha, ginlain sini ang strategies nga nangin epektibo gani siya ang isa sa 3,962 ka mga nakapasar sa 2024 bar examination.
Ginpahayag man ni Singuay nga wala ini nadulaan sang paglaom kag pagsalig nga malab-ot ang iya handum nga mangin isa ka abugado.
Suno diri, high school pa lamang sang nag-umpisa ini nga maghandum nga mangin abugado.
Antes magtuon sang Law, nagtrabaho man ini bilang journalist.
Isa sa mga rason ngaa nag abugado si Singuay, ang agud mangin instrumento nga makuha sang hustisya para sa mga kababainhan kag iban pa.
Wala ini nag-untat sa pagreview kag tanan sini nga bakante nga oras kaangay sang pagbiyahe halin sa ila nga balay padulong sa ulubrahan, siya ang nagascan sang iya notes.
Panugyan sini nga may husto nga oras para sa tanan, gani indi dapat madulaan sang paglaom ang mga wala nakapasar sa Bar exam.
Ginpasalamatan sini ang iya mga ginikanan nga wala nag-untat sa pagsuporta sa iya bisan ang iban ang nagdulaan na sang pagsalig kag nagtalikod na sa iya.
Labi sa tanan, dako ang pagpasalamat sini sa Ginoo.
