Wala pa mahibaluan kun san-o makagwa sa ospital ang nabilin nga mga pasyente nga padayon pa nga ginabulong sa tatlo ka pribado nga mga ospital matapos nangin imbulbado sa hit-and-run nga nagluntad sa Barangay Alangilan, Bacolod City sang Biyernes Santo.
Sa interview sang Bombo Radyo kay Police Lt. Col. Ramel Sarona, pinuno sang Traffic Enforcement Unit sang Bacolod City Police Station, ang mga pasyente nga nabilin sa tatlo ka mga pribado nga ospital ang yara na sa estable nga kondisyon kasubong man ang sadto gin-admit sa Intensive Care Unit (ICU).
Wala naman gin-admit ang mga pulis nga napilasan bangud minor injuries lamang ang ila naagom.
Sang Sabado, ginpahayag ni BCPO Director Police Col. Joeresty Coronica nga 19 tanan ang nahalitan sa aksidente lakip na ang tatlo ka mga casualties.
Suno diri, ginapreparar pa nila ang mga dokumento agud mapasaka sa fiscal office samtang wala pa sa karun sang himata nga nagpasaka sang kaso.
Samtang, desidido naman nga magpasaka sang kaso ang pamilya ni Jonelo Solan Sr. sa Indian national nga suspetsado.
Suno kay Jonelyn Solano, subang nga bata ni Jonelo, magapasaka sang kaso ang ila pamilya agud mahatagan sang hustisya ang ila nga amay.
