Isa sa onse ka tapasero sang tubo nga naigo sang kilat kahapon sang hapon sa Barangay Ma-ao, Bago City ang yara sa kritikal nga kondisyon kag gintransfer na sa Bacolod Adventist Medical Center, samtang ang 10 ka iban pa ang ginalantaw nga mahimo makapauli matapos ang medical treatment sa Bago City Hospital.
Ang mga biktima ang ginkilala kanday Herson Subong, 32 anyos, nga kritikal sa karun ang sitwasyon; kasubong man sanday JR Blanca, 31 anyos; Susano Rojo, 30 anyos; Regie Subong, 21anyos; Leonard Luadro, 20 anyos; Rodrigo Vallota, 36 anyos; Romy Dequiña, 42 anyos; Melody Jocson, 33 anyos; Angelito Tamayo Jr, 38 anyos; Danny Boy Alvarez, 29 anyos kag Carlo Pelarta, 30 anyos.
Santo sa Bago City Police Station, ang insidente ang nagluntad alas-3:00 kahapon sang hapon sa Purok Concordia, Barangay Ma-ao, Bago City, Negros Occidental.
Ang estasyon ang nakabatun sang radio call gikan sa Ma-ao Volunteer Rescue Unit (MAVRU) nga amo ang nagpahibalo natuhoy sa pag-igo sang kilat sa 11 ka biktima.
Samtang ginpahayag naman ni Barangay Ma-ao Kagawad Joemarie Deocampo nga ang mga biktima ang lunsay mga tapasero sang tubo.
Bangod sa hinali nga pag-ulan kahapon, ang mga tapasero ang nagpasilong sa idalum sang dekarga nga truck.
Hinali nalang ang mga ini nakabati sang pagsigabong kag kasunod na sini ang pag-igo sang kilat.
Ginalantaw ni Barangay Ma-ao Kagawad Joemarie Deocampo nga mahimo may nagagamit sang cellphone kag amo ang gin-amag sang kilat.
Panugyan sini sa mga pumuluyo sa Barangay Ma-ao nga likawan ang magpabilin sa open field ukon magpasilong sa idalum sang mga salakyan sa kaangay nga mga pag-ulan, kag mas maayo kun magpauli nalang sa panimalay.
Pahayag sang Barangay Kagawad nga indi naman ini ang una nga beses nga may naigo sang kilat sa Barangay Ma-ao.
Ini bangod sang tinalikdan lang nga mga binulan may-ara sang gindulaan gid sang kabuhi matapos naigo sang kilat.
